Гамбурґ, віды зьверху
Вольны і ганзейскі горад Гамбурґ, Нямеччына, верасень 2015
Google Мапы, Яндэкс.Мапы
Адзін з папулярных спосабаў паглядзець на Гамбурґ — падняцца на царкву сьвятога Міхаіла (Hauptkirche Sankt Michaelis), на мясцовым слэнґу званую проста «Michel» (Міхель). Эвангеліцкая царква, пабудаваная ў 1669 годзе, адначасова зьяўляецца музэем, а яе 132-мэтровая званіца — агляднай пляцоўкай.
Як можна здагадацца з назвы, царква ўзьведзеная ў гонар арханёла Міхаіла, статуя якога стаіць над уваходам.
Вышыня шпіля — 132 мэтры, пляцоўка знаходзіцца на вышыні 106 мэтраў (якраз квадракоптэрная вышыня). Падняцца туды можна на ліфце або па сходах. Я вырашыў трохі прайсьціся.
Зьверху адкрываецца выдатны від, дзе я зрабіў панараму (погляд з поўначы на ўсход).